ប្រសិន​ជួប​ករណី​បែប​នេះ នោះ​មូលហេតុ​អាច​មក​ពី​ប្រភេទ file system។ ជា​ធម្មតា file system ត្រូវ​បាន​បែងចែក​ជា​ច្រើន ហើយ​ក្នុង​នោះ file system ប្រភេទ NTFS ជា​ជំនាន់​ចុង​ក្រោយ​ដែល​មាន​សមត្ថភាព​គាំទ្រ​ការ​បញ្ជូន​ទិន្នន័យ​បាន​ធំ។ ដូច្នេះ​ទំព័រ​នេះ Sabay សូម​បង្ហាញ​ពី​ដំណោះ​ស្រាយ​ចំពោះ​បញ្ហា​នេះ​តាម​ជំហាន​បន្តបន្ទាប់​ដូច​ខាង​ ក្រោម៖
ចំពោះ​ប្រព័ន្ធ​ប្រតិបត្តិការ Microsoft Windows អាច​គាំទ្រ file system មួយ​ចំនួន​ដូច​ជា៖ FAT, NTFS, exFAT និង REFS។ ប្រិ​យមិត្ត​ខ្លះ​ប្រហែល​ធ្លាប់​ឆ្ងល់​ថា ហេតុអ្វី​បាន​ជា Copy ឯកសារ​ចូល USB flash ឬ​ប្រភេទ removable device មួយ​ចំនួន​មិន​បាន ដោយ​លោត​ចេញ​ផ្ទាំង​ដាក់​ថា File Too Large។

ជា​ការ​ពិត​ណាស់ មូលហេតុ​ប្រាកដ​ជា​មក​ពី​ឯកសារ​ដែល​អ្នក​ចង់ copy មាន​ទំហំ​ធំ​ហួស​ពី file system ទទួល​ទុក។ នោះ​អាច​មក​ពី USB flash របស់​អ្នក​មាន​ប្រភេទ file system ជា FAT32 ដែល FAT32 អាច​ទទួល​ឯកសារ​ទុក​ពី​ការ​ចម្លង​ក្នុង​ពេល​តែ​មួយ​បាន​ត្រឹម 4GB ចុះ​ក្រោម​ប៉ុណ្ណោះ។ អ្នក​អាច​មើល​ប្រភេទ file system តាម Properties លើ Device ទាំង​នោះ។ ដើម្បី​ដោះស្រាយ​បញ្ហា​នេះ អ្នក​អាច​ប្ដូរ file system ពី FAT32 ទៅ​ជា NTFS វិញ ព្រោះ NTFS មាន​លទ្ធភាព​អាច​ទទួល​ទុក​ឯកសារ​ទំហំ​ធំ​ជាង FAT32។

ទំព័រ​នេះ Sabay សូម​លើក​យក​របៀប​ប្ដូរ file system នៅ​លើ storage device ណា​មួយ​បាន​ដោយ​មិន​ចាំបាច់ Format ហើយ​ក៏​មិន​បាត់​ទិន្នន័យ​ដែរ។ សូម​អនុវត្ត​តាម​ជំហាន​ខាង​ក្រោម៖

+ តាម Command Prompt
១. ចុច​លើ Start រួច​​របស់ PC រួច​វាយ cmd និង Enter។ ​បន្ទាប់​មក​ផ្ទាំង Command Prompt នឹង​បើក​ឡើង ត្រង់​នេះ សូម​វាយ​ពាក្យ​បញ្ជា chkdsk [drive letter]: /f។ បញ្ជា​នេះ​គឺ​សម្រាប់​ឆែក​មើល​ប្រភេទ file system របស់ storage device។ ឧទាហរណ៍៖ chkdsk h: /f
២. ​ប្រិយមិត្ត​មិន​ចាំបាច់​ឆែក​ប្រភេទ file system ដូច​ខាង​លើ​ក៏​បាន។ ដើម្បី​ប្ដូរ file system សូម​វាយ​បញ្ជា៖ convert [drive letter]: /fs:[file system type] រួច​ត្រូវ​រង់ចាំ​ដំណើរការ​ប្ដូរ។ ឧទាហរណ៍៖ convert h: /fs:ntfs (បញ្ជាក់៖ ចង់​ដឹង​ថា ប្ដូរ​បាន​សម្រេច​ឬ​អត់ អាច​ឆែក​មើល​តាម command ដូច​ជំហាន​ទី១ ឬ​មើល​តាម properties នៅ​លើ storage device)
សាក​ល្បង copy ឯកសារ​ទំហំ​ធំ​ជាង 4GBម្ដង​ទៀត​មើល៍ តើ​អាច copy ទៅ​រួច​អត់?

 ដោយ៖ ឈុន ហួរ